هو فى حاجه اسمها الخوف الشديد من الامتحانات أو بمعنى آخر اسمها الخوف من الفشل؟
أنا أخويا فى كليه طب، وعنده رعب شديد بيبقى قبل الامتحانات ومش بيعرف يذاكر ويبقى فى حالة اكتئاب شديدة جدا، وحتى مش عايز يكلمنا فى البيت، وفعلا ما يدخلش فى الأول، ويدخل الامتحان تانى مرة، ويجيب امتيازات!!
مش عارفه فعلا إيه إلى بيحصله..
صديقتى الكريمة..
طبيعى جدا إننا نخاف من الفشل.. ده موجود ومقبول ومفهوم عند كل الناس.
لكن.. فيه خوف تانى غريب وعجيب وغير مفهوم.. اسمه الخوف من النجاح.. وده بيكون موجود ــ غالبا ــ فى طبقة عميقة جدا من نفسنا البشرية.. وبكل أسف، أكتر حد بيحسه ويتأثر بيه هما الأشخاص الأذكياء جدا.. الحساسين جدا.. والمبدعين جدا..
النجاح يا عزيزتى مخيف ألف مرة أكثر من الفشل..
النجاح بيكون معاه مسئولية.. مسئولية الوصول ليه، والمحافظة عليه، واستمراره..
الفشل مافيش معاه أى مسئولية.. والفشل المتكرر قد يكون اعلان بالتخلى عن المسئولية..
النجاح ليه تمن.. وبيكون غالى جدا أحيانا.. تعب وسهر وقلق وخوف.. ويتكرر مع كل نجاح..
الفشل تمنه أقل بكتير.. وبيدفعه أحيانا أشخاص آخرين..
اختزال الشخص فى نجاحاته أسوأ بكتير من اختزاله فى فشله.. وقتها يتحول النجاح إلى سجن لا يستطيع صاحبه الخروج منه بسهولة..
أخوكى عاوز يقول بخوفه حاجة.. احتمال يكون بيعترض على رسالة وصلته إن وجوده يساوى درجاته ومجموعه.. احتمال يكون عاوز يقول: «شوفونى زى ما أنا، أنا مش ما أحقق أو أنجز».. احتمال يكون عاوز يقول (لأ)..
وفيه طبعا احتمالات أخرى كتير.. تستدعى كلها زيارة طبيب نفسى مختص.. للعرض والاستشارة والعلاج.
الناجحون خائفون أبدا..
المبدعون بيأكلهم القلق ليل نهار..
الأذكياء يشكون فى أنفسهم دائما..
تحياتى لك..
د. محمـد طــه