عن الكتاب

مهم جدا في رحلة أي حد فينا إنه يقف قدام المراية … المراية النفسية … اللى من خلالها يقدر يشوف نفسه ، ويعرفها ، ويتعلم منها .. علشان يخرج عن النصوص القديمة ويبدأ يقبل نفسه ويحبها ، ويغيرها للأحسن، وهي رحلة تستحق التعب، والصبر، وبعض الآلم الكتاب ده هايساعدك انك تشوف نفسك ، بكتير من تفاصيلها وخباياها .. تشوف الآخرين بطريقة جديدو ومختلفة تماماً .. وتشوف علاقاتك بدرجة عالية من الدقة والوضوح … الكتاب ده هايساعدك انك تتغير وتخرج عن النص

عن الكتاب

ممكن تكون أعقد حاجة فى الدنيا هى العلاقات بين البشر .. مش بس أعقد .. لا هى كمان أخطر ،وطبعًا أصعب .. العلاقات بين البشر زى ما هى أحد الأسباب المهمة للسعادة والبهجة والأقبال على الحياة .. ساعات بتكون أحد أهم مصادر التعاسة والالم .. ممكن علاقة تطلعك سابع سما، وعلاقة تانية تنزلك سابع أرض .. اللى بيبوظ ويشوه ويؤذى الناس علاقة .. واللى بيصلح ويغير ويعالج الناس برضه علاقة . فى كتاب « علاقات خطرة» هانتكلم عن أنواع وأشكال كتير من العلاقات.. بدءًا من علاقتك بنفسك .. وإنتهاء بعلاقتك بكل اللى تعرفهم.. الكتاب دة عنك .. وعن اللى حواليك .. وعن اللى بينكم .. الكتاب دة مش هايفارقك .. لانه بكل بساطة هيبقى حته منك .. وإحتمال تكتشف مع آخر صفحاته .. إنك شاركت فى كتابته..

عن الكتاب

التغيير هو أكبر تحدي ممكن يواجهك في حياتك..
والتغيير الحقيقي، بيكون معاه صعوبتين..
الصعوبة الأولى.. إنك هاتكون عامل زي الطفل المولود جديد.. بتخرج للحياة ومعاك كل المخاوف زي ما معاك كل الفرص.. بتتعرّف على نفسك وعلى الناس وكأنك بتشوفهم لأول مرة.. بتختار اختيارات جديدة.. وتمشي في سكك مختلفة.. حتى لو كانت مُوحشة.. أو مهجورة..
الصعوبة التانية..هي إن التغيير له تمن.. والتمن ده ممكن يكون غالي جدًا..
الكتاب ده عن التغيير.. عن خطواته.. وعن تمنه..
عن احتياجاتك.. ومخاوفك.. وحقوقك النفسية..
عن قراراتك اللي أخدتها زمان.. وقراراتك اللي هاتخدها دلوقت..
الكتاب ده هاينقلك بهدوء وثقة.. من مرحلة (الحبو) خارج النص..
و(المشي) فوق أشواك العلاقات الخطرة وتجاوزها..
إلى الضرب على الأرض بشكل إيقاعي متتابع ومبهر..
وكأنك راقص فلامينكو محترف..
يرقص فوق آلامه.. ويزلزل القلوب أمام عينيه..
يعلن عن نفسه في وجه العالم.. مع كل دبدبة عالية مدوّية من قدميه..
يرفع عنقه نحو السماء.. ويغرس بذور وجوده الجديد في أعماق الأرض..

جهّز قلبك وعقلك وروحك..
لتقابل نفسك..
كما لم تعرفها من قبل..

عن الكتاب

مهم جدا في فيه فرق كبير بين الرجولة والذُّكورة..
الذُّكورة هي النوع.. الرجولة هي الفِكر.. الذُّكورة هي الجنس.. الرجولة هي السلوك.. الذُّكورة هي البيولوجيا.. الرجولة هي الموقف.
هذا الكتاب ليس عن “الرجل الشرقي”، الذي سمعنا عنه وعرفناه قديمًا.. بل هو عن “الذَّكَر الشرقي” الذي تسلل إلينا مؤخرًا، وعاش بيننا بديلًا عنه.. تلك النسخة الباهتة في ألوانها، والمُشوَّهة في ملامحها. “الذُّكورية الشرقية”- بهذا الشكل وذلك السلوك- مرض صعب جدًّا.. مش بس مرض.. دي مُتلازمة مَرضية كاملة.. تبدأ من تربية الآباء والأمهات لأبنائهم وبناتهم.. وتنتهي نهايات مأساوية مُجحِفة للجميع.
الكتاب دة هيحاول يقرب.. ويستعرض.. ويحلِّل.. ويفهم.. أعراض، وأنواع، وأسباب، ومُضاعفات “الذُّكورية الشرقية”.. ويقدم رؤى واقعية لتغيير وعلاج هذه المُتلازمة المَرضية المستعصية.
والحقيقة إن هذا التغيير.. لو ما بدأش يحصل من الآن.. فتأكدوا… إن هذا الديناصور البشري الضخم.. لو لم يُدرِك.. ويفهم.. ويتطور.. ويقوم بتفكيك.. وإعادة تركيب نفسه من جديد.. فلن يكون له أي مكان، سوى ركن بعيد مُختَفٍ، في أحد متاحف العالم، تحته لافتة صغيرة مكتوب عليها بخط غير واضح:
“ذكر شرقي منقرض”.

عن الكتاب

فيه ميراث بيتم توزيعه وقت الولادة..
بمجرد ما حضرتك تتولد.. بتبدأ فى استلام تركة ثقيلة وممتدة من كل أجيال أسرتك، دول يسلِّموك مخاوفهم.. ودول يسلِّموك نقط ضعفهم.. ودول يسلِّموك نصوص حياتية مُعدة مسبقًا..

إحنا محتاجين نقف وقفة حاسمة وجادة.. نراجع فيها كل ما تسلمناه..
محتاجين نخرج عن النص.. ونبدأ في الكتابة من جديد.. بأقلامنا نحن..

تم نشر كتاب (الخروج عن النص) سنة 2015..
واليوم.. وبعد ست سنوات من الوعى.. تحول كتاب (الخروج عن النص) الأصلى إلى الباب الأول فى هذا الكتاب.. والذى يحمل الباب الثاني منه اسم (العودة إلى الحياة).. والمكون من اثنا عشر فصلًا جديدًا..

في الباب الأول (الخروج عن النص)، هنعرف يعنى إيه حدود نفسية.. وإيه هي نفسك الحقيقية ونفسك المزيفة.. وليه بنكرر أحيانا نفس الغلطة..
هننتعلم عن المواقف غير المنتهية.. والمشاعر اللي بنحسها.. بس هي في الحقيقة مش مشاعرنا..
هانكتشف ازاى ممكن نكون عايشين نصف حياة… وايه الأدوار اللى بنلعبها في سيناريوهات حياتنا.. وإيه هو أقوى سلاح في تاريخ البشرية..

وفى الباب التانى (العودة إلى الحياة).. هانتكلم عن الصوت الداخلى اللى بيطلع من جوانا، ويرسل لينا رسايل صعبة، تفسد علينا طعم الحياة..
هانستعرض بالأمثلة بعض القرارات اللى بناخدها واحنا صغيرين، واللى بتتغير معاها حياتنا للأبد..
هانتكلم عن الانتحار.. وإيه معنى إن حد يقرر ينهي حياته..
هانشوف الخوف من الهجر والوحدة ممكن يعمل إيه في أصحابه..
هانفهم اختياراتنا بتقول عننا إيه.. وهانعرف ازاى مانخليش احتياجاتنا.. تبهدلنا..

ياللا بينا نخرج عن النص.. في اتجاه النور.. في اتجاه الحياة..

محمد طه