السلام عليكم أستاذى العزيز..
سمعت حضرتك بتتكلم قبل كده عن «العلاقة اللى ماتتسماش».. ومتهيألى أنا حاليا فى علاقة بالشكل ده.. ممكن حضرتك تقولى أعمل إيه؟ أخلص منها إزاى؟
أختى العزيزة..
أشكرك لسؤالك واستفسارك..
خلينى أقولك وأقول للقراء الأول إيه هى «العلاقة اللى ماتتسماش».. واللى رغم إنه عنوانها غريب، لكنه هايوضح مع الكلام..
فيه كتير علاقات بأشوفها مش بيكون ليها اسم معين، ولا ملامح محددة.. وده بيكون من أكبر مشاكلها..
يعنى علاقة بين واحد وواحدة..
أقولها: بتحبيه؟
تقولى: يعنى..
طيب هو بيحبك؟
لسه مش متأكدة..
ووقت يضيع ومشاعر تنهك.. وإحنا حتى مش عارفين بنعمل إيه..
واحدة تانية بتحبه وبيحبها، طيب هاه..
ناويين على إيه؟
لا لسه مش عارفين!
يعنى إيه مش عارفين؟ ناوى يتقدم ويخطبك إمتى؟
لا هو لسه قدامه 4 سنين لغاية ما يشوف هايعمل إيه؟
طيب فى الأربع سنين دول هاتعملوا إيه؟
أدينا بنحب بعض!
فى الحقيقة.. دى مش علاقة.. ده نزيف مشاعر.. ماساج عاطفى.. أو فى أحسن الأحوال.. تعلق بالفراغ.. علشان بعد أربع سنين، غالبا هو هايكون بنى آدم تانى وهى هاتكون بنى آدمة تانية..
حد ثالث..
أنا فى علاقة وتخطينا حدود كتير أوى مع بعض..
طيب ما اتجوزتوش ليه؟
لا.. إحنا الاتنين عندنا فير أوف كومتمنت Fear of commitment !!
أيوه يعنى اللى إنتوا فيه ده اسمه إيه؟ إيه الخطوة الجاية؟
يعنى!! مش عارفين لسه!!
العلاقات دى مالهاش عنوان.. ما تعرفش تسميها إيه.. لا هى حب، علشان الحب الحقيقى علاقة فيها مسئولية ووعى والتزام.. ولا هى خطوبة، ولا هى جواز.. ولا هى أى حاجة.. حاجة ما تتسماش كده..
مهم أوى ــ يا عزيزتى ــ فى أى علاقة إنها تكون واضحة، وليها معالم وليها مسمى.. ومهم أكتر إن أصحابها يكونوا عارفين أولها من آخرها.. يعنى عارفين هانعمل إيه إمتى.. مش سايبينها كده زى ما تيجى..
العلاقات اللى بالشكل ده بتاخد من طاقتنا ومشاعرنا ومجهودنا ونفسنا كتير جدا، لدرجة فعلا مخيفة..
علشان كده.. لو إنتى فى علاقة مالهاش اسم.. مش عارفة أولها من آخرها.. مش متأكدة انتى رايحة فين وجاية منين.
د. محمــد طــه