أكمل واللا لأ؟

– قرار الطلاق مش غلط.. هو فى الحقيقة جه متأخر..
– كونك تكملى ببساطة كده بعد أول مرة مد إيده عليكى فيها، ده وصلّه فوراً رسالة إنه ينفع يعمل كده تانى وتالت..
– مافيش أى مبرر ولا سبب ولا حق يخلى زوج يضرب زوجته.. والكلام المتكرر من عينة (أكيد انتى اللى استفزيتيه) أو (شوفى انتى عملتى إيه خلاه يضربك) أو (تلاقيكى عصبتيه عليكى).. ده يعبر عن خيبة تقيلة اسمها قلب الترابيزة ولوم الضحية..
– ما يصل لبناتك دلوقت هو ان الواحدة منهم لما تكبر وتتجوز وتتضرب وتتأذى، تسكت وتستحمل وتكمل لآخر نفس.
– خوفك مفهوم ويتقدر.. علشان كده مهم يكون حواليكى support system دواير من الدعم.. أهمها الشغل والأهل (لو جدعان)، والونس بالأصحاب الحقيقيين.. وربنا طبعاً قبل كل دول.
– احنا وصلنا لدرجة من التشويه النفسي تخلى المتضررة تشك فى حقها فى رفع الضرر عن نفسها، وتسأل وهى خائفة ومترددة (أكمل واللا لأ؟).. تكملى إيه يا ستى؟