عزيزتى..
قدامك تلات اختيارات:
1. انك تستنى لما حضرته يتفضل ويتكرم وينعم عليكى بالزواج منه.. وتعرفى انك وقتها تزوجتى من شخص لن يتحمل أى مسئولية.
2. انك تنفدى بجلدك وتقطعى هذه العلاقة فوراً.. وتخليكى جدعة وشجاعة وتتحملى ألم الانفصال.. اللى ممكن يخففه شوية انك تشتغلى وتخرجى مع أصحابك وتتعلمى كورس أى حاجة جديدة (لغة، طبخ، رقص).. خاصة انكم مش متجوزين ومافيش أولاد وانتى مش ملزمة بتحمل كل ده على الإطلاق.
3. انك تقفى وقفة جادة وتقوليله: قدامك فرصة 6 شهور تروح تتعالج عند طبيب نفسي.. وتنتظم فى جلسات العلاج.. وهاقابل الطبيب أطمن منه إنك انتظمت واتعالجت واتغيرت.. ووقتها لو عاوز تتقدم أهلا وسهلا.. ولو مش عاوز أنا مش هاكمل.. وطبعا لو رفض فكرة العلاج من الأول يبقى ترجعى للاختيارين اللى فوق.
صديقتى الكريمة..
احنا مش بنحب علشان نتبهدل..
ولا بنقرب علشان نتحرق..
ولا بندى علشان نستنزف..
لما تعاملى نفسك على إنك ماتستاهليش.. ماتستنيش من اللى قدامك يعاملك على إنك تستاهلى..
د. محمد طه
