أكثر الأشياء بداهة..

– مش من حق أب أوأم يهينوا أو يشتموا أو يسخروا أو يؤذوا ابنهم أو بنتهم نفسياً.
– مش من حق أب يمد إيده ويضرب ابنه أو بنته أو يتعدى عليه جسدياً بأى شكل وبأى درجة.
– مش من حق أب أو أم أو أخ أو أخت أو خال أو عم أو أى حد يلمس أى جزء من جسم الابن أو الابنة بشكل مخجل أو مريب أو متعدى للحدود.
– مش من حق أب يكتف أو يحبس أو يمنع ابنه أو بنته من الخروج وخاصة للذهاب لمدرسته أو كليته.
– مش من حق أب أو أم يجبروا أبناءهم على دخول أو عدم دخول كلية معينة، أو شغل معين.
– مش من حق أب أو أم أو خال أو عم إجبار ابنهم أو بنتهم على الزواج من/ أو عدم الزواج ممن يرغب/ترغب.
– مش من حق أب أو أم يبتزوا أبناءهم عاطفياً (علشان يعمل الحاجات اللى فاتت أو غيرها) تحت أى مسمى.
– مش من حق زوج (ولا زوجة طبعاً) يمد إيده على زوجته أو يضربها أو يؤذيها جسدياً أو نفسياً بأى شكل وبأى درجة.
– مش من حق زوج يرغم زوجته على العلاقة الجنسية تحت أى بند وأى ظرف.
– مش من حق زوج (ولا زوجة طبعاً) يهين أو يشتم أو يسخر أو يقلل من شأن زوجته بأى طريقة من الطرق.
– مش من حق زوج يحبس أويمنع زوجته من العمل أو من الخروج أو من عمل علاقات طبيعية /أو يجبرها عليهم.
– مش من حق زوج يبتز زوجته نفسياً تحت أى مسمى.

بالمناسبة أى حد بيجيلى يشتكى من حاجة من دول، باطلب منه فوراً:

– يقول لأ ويوقف ده بقدر الإمكان.
– يطلب تدخل حد من الأقارب الموثوق فيهم لوقف الضرر الواقع عليه/عليها.
– يطلب تدخل أحد رجال الدين اللى ليهم كلمة مسموعة لدى الأب/الأم/ الزوج/الأقارب.
– يتصل أو تتصل بأى من الأرقام التالية:
* خط نجدة الطفل: 16000
* المجلس القومى للمرأة: 15115
– يعمل محضر فى أقرب قسم شرطة ويستعين بمحامى/ محامية للحماية ووقف التعدى.

البداية دايماً من عندك..