(معلهش هابوظ عليكم الأغنية)..
باحب الفن الجميل.. بيلمس كل خلية جوايا.. كلمات شعرية رقيقة.. مقطوعة موسيقية راقية.. لوحة فنية مبدعة.. أغنية حلوة.. فيلم عميق.. صورة جميلة..
الفن هو أحد المصادر المعرفية الهامة..
عاوز تعرف العالم الداخلى لانسان معين شكله ايه؟ شوفه بيسمع ايه وبيحب يشوف ايه..
عاوز تعمل تشريح نفسي لمجتمع ما، أو ثقافة بعينها؟ شوف (معظم) ناس هذا المجتمع بيميلوا لسماع إيه ورؤية إيه ومتابعة إيه..
ودى طبعاً طريقة واحدة من ضمن طرق كتير..
المهم..
أغنية جميلة انتشرت مؤخراً.. لكنها بتوصف كتير من الإحباط.. كتير من الأسى.. كتير من الحزن..
الأغنية على قدر ما تثيره فى الناس من مشاعر.. على قد ما تلفت النظر لPattern (نمط) واضح ومتكرر جداً فى علاقة مجتمعنا وثقافتنا ب(الحزن)..
راجع كده المخزون الهائل من الأغانى اللى كان ليه نفس الأثر والانتشار وسط طبقات كتير وأعداد هائلة من الناس.. من أول (كتاب حياتى يا عين).. لغاية (رياح الحياة)..
كتاب حياتى يا عين.. ما شوفت زيه كتاب
الفرح فيه سطرين.. والباقى كله عذاب..
عذاب.. عذاب.. عذاب.. آآآآآآآآآآه يا عين
ده لا يعنى طبعاً اننا مش بنسمع ونحب أغانى فرايحى ومليانة بهجة وسعادة.. ده بيحصل أكيد. بس أكيد برضه انت واخد بالك من فرق الانتشار وفرق الأثر وفرق التأثر..
بص بصة على الفولكولور الشعبى وحكاياته المورورثة والمحكية فى شكل زجل وشعر غنائى.. هاتالاقى من أشهرها مثلاً:
يا بهيه.. وخبرينى.. يا بوى عن حال العاشقين.. ليلى عينى عن حال العاشقين
حبيت و الشوق كاوينى.. يا بوى.. و إن قولت أقول لمين.. ليلى عينى.. و إن قولت أقول لمين..
داريت الحب عنه .. و يا ويل اللى يداريه..
ومدام الجرح منه .. ما فيش غيره يداويه..
هنا مش بس الحبيب بيجرح.. لأ.. دانا كمان هاستنى منه انه هو شخصياً اللى يداوى..
الحب عندنا مرتبط بالجرح.. وبالمعاناة.. وكمان بالخيانة..
مرتبط بالجرح أكتر من الفرح.. وبالمعاناة أكتر من المتعة.. وبالخيانة أكتر من الولاء..
من أول:
جبار، جبار.. في رقته جبار
جبار.. في قسوته جبار
خدعتني ضحكته
وخانتني دمعته
وما كنتش أعرف قبل النهار ده
إن العيون دي تعرف تخون بالشكل ده
و
أروح لمين و اقول يا مين ينصفني منك
ما هو انت فرحي و انت جرحي و كله منك
مروراً ب:
حسستك بالأمان وأديتك الحنان
وحاجات كتير زمان ما قدرتيش تفهميه
قلبي ضيعتي حقه، ضيعتيه رغم صدقه
ونهاية حبه ليكي إنتي اللي بتكتبيها
و..
علمني حبكِ ان أحزن
وانا محتاج منذ عصور لامرأة تجعلني أحزن
لامرأة أبكي فوق ذراعيها مثل العصفور
أدخلني حبك سيدتي مدن الأحزان
وأنا من قبلك لم أدخل مدن الأحزان
وانتهاء ب:
جرح تاني.. هو قلبي لسه طاب من الاولاني
أروح له تاني.. هو قلبي ينسى جرحه الاولاني
و..
أعاتبك على إيه والا إيه والا إيه..
على الليل والا الجراح. والا عمرى اللى راح..
و..
أودعك.. آخر وداع.. آخر وداع..
يا عمر ضايع.. يا عمر ضايع..
فيه حالة متكررة من المظلومية والثبات عند دور الضحية فى علاقات الحب.. الضحية اللى بتستمتع بالعذاب.. وتستعذب الألم.. وتستدعى المعاناة..
شوف دى:
تعبت منك.. عشان ماليش غيرك ولا بستغنى عنك
وعشان بحبك.. ماليش مكان في زعل أروحله إلا حضنك
وعشان ماليش غيرك حبيب..
بقليلي برضى.. وأستنى منك كلمة حلوة تقولها ليا
بسمعها بهدى.. وأنسى إني عشت معك أقل من العادية
وأصبر عليك.. من حبي فيك
هتحس امتى.. إني مافيش في إيديا حاجة غيرإني أحبك
وإن كنت ساكتة.. فعشان ماتحرمنيش في يوم من العيشة جنبك
مأقدرش أعيش غير بين ايديك
ليه كل همك.. في الدنيا تثبت بس إني مش مهمة
والرأي رأيك.. وإني أنا جنبك ماليش ولا أي كلمة
وبعيش معاك صورة وخلاص
أنا عشت عمري.. برضيك وباجي كتيرأناعلى حساب كرامتي
كان كل همي.. إن انت تغلط واسمعك بتقول حبيبتي
وعشان رضاك خسرت ناس
اه اه اه اه اه اه اه اه اه اه اه اه
طيب شوف دى بقى:
فيه حد ممكن يبقى مش قادر يعيش من غير الم
فيه حد لو ساب اللى ظلمه يبقى هموت من الندم
خلتنى اخاف على حبى ليك
اكتر ما اخاف على نفسى منك
خلتنى ارتاح للعذاب وانا بين ايديك
علشان بخاف من عذاب البعد عنك
وقفت حياتى عليك وبس
وكأنى بفرح لو لاقيت قلبى اتظلم
ظلمت فيا ولسه عايشه لـحبى ليك
باصعب عليا ولسه مش بصعب عليك
غمضت عينى مشيت فى سكه محسبتهاش
وعشان بحبك حبيت حجات مبحبهاش
وادى النهايه
فى علاقات الحب عندنا.. دايماً فيه بكائيات..
بكائية قبل العلاقة.. بحثاً عن علاقة وشعوراً بالوحدة..
وبكائية أثناء العلاقة.. تأثراً بلوعة الحب.. وشكوى من قسوة الحبيب.. وخوفاً من الفراق..
وبكائية بعد العلاقة.. بكائية على الخيانة.. وعلى الظلم.. وعلى الأطلال..
احنا الثقافة الوحيدة فى العالم.. اللى كان جزء أصيل من بدايات أشعارها وقصائدها القديمة مخصص فقط، للبكاء على الأطلال..
أمر على الديار ديار ليلى.. أقبل ذا الجدار وذا الجدار
وما حب الديار سكن قلبى.. ولكن حب من سكن الديار
أكرر..
ده مش معناه ان العكس مش موجود.. فيه كتير أشعار وأغانى مليانة بهجة وفرحة ومتعة.. لكننا بنتأثر أكتر بالحزن والشجن والدراما..
تعالى نوسع الصورة شوية..
مش بس الحبيب هو اللى بيخون ويقسي.. الاصحاب كمان خاينين.. مخادعين.. يظهروا عكس ما يبدوا.. ويقولوا غير ما بيعملوا.. تلاقى ده واضح أوى فى كتير من الأغانى الشعبية.. والمهرجانات.. وحتى الأمثلة والأقاويل اللى مكتوبة على ضهر الميكروباصات والتكاتك.. دى طبقة من طبقات ثقافتنا..
عندك مثلا:
من كتر الناس اللى بميت وش.. وحشونا الناس اللى بوشين.
و:
ملعون أبو الناس العزاز.. اللى لما احتاجنا ليهم طلعوا أندال بامتياز..
و:
أنا مش تمام
غرقان ونفسي أوصل في يوم بر الأمان
حتى الزمايل صبحوا مالهومش أمان
مالهومش أمان
مش بس الحبيب قاسي وظالم.. والصاحب والقريب خاين وكداب..
لا..
الدنيا نفسها مالهاش أمان.. وغدارة ودوارة وخداعة..
وتقدر دلوقت تلاقى أمثلة كتيرة لوحدك..
تعال نوسع الصورة أكتر..
إيه رأيك فى ميل مجتمعاتنا لرؤية العالم كله بيتآمر عليها؟ !! اننا ضحية لكل العالم!! تقدر تشوف ده خارج نفس السياق؟
إيه رأيك فى ميل ثقافتنا لتصديق ان باقى الثقافات بتكرهنا وتحقد علينا وعاوزة تدمرنا؟
إيه رأيك فى استقبالنا حتى لكتير من الاكتشافات العلمية الحديثة على انها مؤامرة مقصودة على مجتمعنا.. وثقافتنا.. وديننا.. وشبابنا.. و.. و.. ؟
ده كله يقول إيه؟ هات من الآخر يا دكتور..
هأقولك بس من فضلك اهدى كده.. وخلى مشاعرك وعواطفك فى حيادية شوية.. وسيب عقلك يقرا الكلام ويقود الفهم والمناقشة..
ده كله يقول إنه زى ما فيه أفراد بيميلوا للبكائيات.. فيه مجموعات كاملة تميل للبكائيات.. والندم على ما فات.. واستدعاء الذكريات..
زى ما فيه أشخاص بيستمتعوا بالمظلومية ودور الضحية.. فيه برضه مجتمعات بتستمتع بالمظلومية ودور الضحية..
زى ما فيه ناس بيعملوا دماغ من المكيفات.. فيه ثقافات بتعمل دماغ من اجترار الأحزان.. دماغ أحزان..
علاقة توكسيك مع الحب نفسه..
علاقة أبيوسف مع الذكريات والنوستالجيا..
علاقة اعتمادية مع الألم..
انت بتقول اننا بنحب المظلومية ونعمل دماغ من الأحزان يا دكتور؟
لا طبعاً..
بافكرك تانى تخلى مشاعرك على جنب دلوقت.. واقرا وافهم الكلام بعقلك..
دى فقط دعوة للتأمل.. دعوة للرؤية والتفكر.. دعوة للسؤال والمراجعة والبحث عن إجابة.. والإجابة قد تثير تساؤلات أكتر.. تصل إلى علاقتنا بالحياة نفسها.. ومنظورنا ليها.. ومعناها بالنسبة لنا..
علشان الخطوة الجاية.. هى: ليه؟ احنا بنعمل كده ليه؟ إيه أبعاد ده ومستوياته ومعانيه؟
بس نهضم الكلام ده الأول..
وبعدين نتفاهم..
معلهش بوظت عليكم الأغنية..
حقكوا عليا..
د. محمـد طــه