إحنا بنخزن نسخ حية (صوت وصورة) من الآخرين المهمين فى حياتنا (سواء اللى بنحبهم أو اللى بنكرههم) داخل عقولنا ونفوسنا.. بنخزن نسخ من الآخرين اللى بنحبهم علشان لما نحتاجلهم فى غيابهم نقدر نفتكرهم ونتونس بيهم.. وبنخزن نسخ من اللى بنكرههم علشان نعمل فيهم (جوانا) اللى مش قادرين نعمله فيهم برّانا/وجهاً لوجه..
دى مقدمة لابد منها مبنية على نظرية (العلاقة بالموضوع).. علشان ماتستغربش من الكلام الجاى..
أحيانا بيكون النهم الزائد للأكل طريقة بائسة أخيرة لإشباع احتياج نفسي عميق لوجود ناس بنحبهم (جوانا) ..بس ده مش متاح فى صورة بنى آدميين.. يبقى نملا نفسنا بالمتاح والموجود.. فى صورة نوبات متكررة ومستمرة من الأكل والبلع والتخزين.. بيسموا ده فى الطب النفسي binge eating.
فيه ناس بقى.. بعد ما ياكلوا ويشبعوا بيتعمدوا (القئ).. الترجيع يعنى.. ومن نفس وجهة النظر.. بيكون القئ هنا هو الوسيلة الرمزية الوحيدة لطرد أى حاجة (وأى حد) أنا خزنته جوايا وتسبب لى فى أذى نفسي ومعنوى.. بس ماينفعش أمد إيدى وأطلع شخص بعينه من عالمى النفسي الداخلى.. فاستبدل ده بترجيع الأكل من معدتى، علشان ده اللى أقدر عليه.. وبيسموا ده Bulimia.
وأخيرأً.. ساعات بيكون العزوف عن الاكل، وفقدان الشهية الشديد، إعلان قاسى عن رفض إدخال أى آخر فى عالمى الداخلى حتى لو كان هذا الآخر مجرد (لقمة)، وده من كتر الأذى والتشويه والضرر اللى سببه ليا الناس اللى فتحتلهم حدود نفسي واستأمنتهم عليها ودخلتهم جوايا.. فيبقى بلاش أدخل أى حاجة جديدة، وبلاش مخاطرة، واللى يتلسع من الشوربة ينفخ فى الزبادى.. وده مرض نفسي تالت اسمه Anorexia.
طبعا فيه تفسيرات تانى كتير غير المكتوبين هنا.. بس ده أعمقهم وأقربهم بالنسبة لى.
كتير من الأمراض نفسية عبارة عن تشبيهات ورموز يفهمها من يجيد قراءتها.. كتير من الأعراض النفسية رسائل مشفرة موجهة للعالم الخارجى بهدف طلب المساعدة.. كتير من الصعوبات النفسية وراها علاقات مضطربة (بآخرين)..
آخرين حبيناهم.. وخذلونا..
آخرين سلمناهم نفسنا.. وخانوا أمانتها..
آخرين.. استباحوا حرمة عالمنا الداخلى.. وعاثوا فيه فسادا..
خلّوا بالكم من الرسايل اللى بتوصلوها لأولادكم..
ماتدخلوش فى علاقات حب وانتوا ناويين تجربوا وتهزروا وتلعبوا بقلوب بعض..
ماتتجوزوش من غير ما تحسوا إنكم اتنين بنى آدميين متساويين، ومتكافئين فى الحقوق والواجبات.. مش سيد وعبد.. أو غالب ومغلوب على أمره..
كله بيتخزن جوانا..
وجوانا ممكن يتعب.. أو يمرض.. أو ينهار..
د. محمد طه
