ايه هو مفهومك للحب يا دكتور؟
شوف يا سيدى..
لو كل يوم كتبت مفهومى عن الحب.. فكل يوم أنا ممكن أوصف وصف مختلف عن التانى.. لان الحب بالنسبة لى شئ متحرك وواسع وبيتطور وينمو، كأنه كائن حى..
الحب كائن حى..
الحب عندى زى الوعى.. أو يمكن نوع فريد من الوعى.. وهما الاتنين -فى رأيي- مرتبطين ببعض، وبيغذوا بعض.. الحب يغذى الوعي.. والوعي يغذى الحب..
عارف يعنى إيه (جدْل)- بتسكين الدال؟ زى البنت اللى (بتجدل) ضفيرة شعرها كده؟
الحب فى رأيي (اليوم) هو ان كل المتضادات والمتقابلات تتلاقى وتنسجم وتبقى فى ضفيرة واحدة..
بمعنى..
إنى أكون فى حالة أو علاقة.. أقبل فيها نفسي من خلال قبول اللى بحبه ليا.. ونفس الكلام بالنسبة له.. هو كمان يقبل نفسه من خلال قبولى ليه..
انى اعرف نفسي من خلال الآخر.. والآخر أيضاً يعرف نفسه من خلالى..
انى احب نفسي واحترمها واقدرها.. من خلال حب واحترام وتقدير اللى معايا.. وهو كمان يحب نفسه ويحترمها ويقدرها.. من خلال حبى واحترامى وتقديرى له..
انى أقبل الحياة كلها بكل صعوباتها وحيرتها من خلال العلاقة دى..
انى اسامح نفسي من خلال العلاقة دى..
انى اسامح أحيانا ناس آخرين بفضل عمل الحب ده فيا.. ناس مالهومش دعوة بالعلاقة دى من أصله..
الحب هو ان وعيي يوسع من خلال علاقة..
انى اكون رحيم بالناس وبنفسي وبكل شئ من خلال علاقة..
ان روحى تتجاوز الكون كله من خلال علاقة..
كل ده يتضفر يوم بعد يوم.. يتجدل، ويكبر، ويوسع..
ومافيش يوم فيه زى اللى قبله..
الحب عملية متجددة.. مش احساس ثابت..
الحب رحلة من الوعى.. بالمعنى الاكبر والاعمق..
طرفي الحب هما طرفي ضفيرة..
من بعيد تشوفها حاجة واحدة..
من قريب.. تكتشف انها طرفين مجدولين..
لأنك مهما قربت واندمجت ودوبت فى اللى قدامك.. بتفضل محتفظ بفردانيتك وخصوصيتك واستقلالك..
لحظة التقاء الغضب.. مع الود.. على كتف اللى بتحبه..
لحظة تلامس الاحتياج.. مع عزة النفس.. فى عيونه أمامك..
لحظة المعاناة.. ثم الالتئام.. على راحة يده..
لحظة الألم.. المعجون بالأمل.. سوياً ومعاً..
لحظة العطاء.. اللى هو فى نفس الوقت أخذ.. والأخذ اللى هو كله عطاء..
لحظة احتضان السماء الهادئة المهيبة.. بالبحر المتقلب الهائج.. فى ضفيرة مجدولة.. تبدأ من داخل روحك.. وتنتهى بعد أطراف الكون..
لما كل حاجة وضدها يتلاقوا.. بانسجام وهارمونية.. هنا تجد الحب..
هو ده وصفى واحساسي فى مرحلتى الحالية من الوعي..
فالحب درجة من درجات الوعى..
والوعى شكل من أشكال الحب..
يمكنك ارتقاء سلم الوعى من خلال الحب..
ويمكنك السمو بمعنى الحب من خلال الوعي..
وكل ده.. هو فقط أحد تجليات الحب.. وأحد جوانبه وأركانه..
فالكلمات لا تعبر عن المعنى جيداً..
الكلمات تسجن معانيها داخلها..
وتقلص حجمها وروعتها بين حروفها الصماء..
الكلمات تختزل ما هو أوسع وأرحب.. فيما هو أضيق وأصغر..
لا شئ يتسع للحب..
ولا شئ يسع الحب..
د. محمـد طــه