نوفمبر 2006
كنت فى لقائى الثانى مع مشرفى للدكتوراة- الانجليزى المخضرم.. أستاذ التحليل النفسي بجامعة اسيكس فى انجلترا.. ومؤسس المجلة البريطانية للعلاج النفسي British Journal of Psychotherapy.. وأحد أعمدة نظرية (ميلانى كلاين) فى العالم.. وصاحب عشرات الكتب ومئات الفصول والأبحاث والأوراق العلمية، واللى اترجمت للغات كتير منها العربية.. (عندنا -وقتها ولغاية دلوقت-كانوا بيقولوا على التحليل النفسي والعلاج النفسي الدينامى انه علم منقرض وobsolete.. من غير حتى ما حد يتعب ويفتح صفحة الكلية الملكية البريطانية للطب النفسي علشان يكتشف انه أحد الثلاث طرق الأساسية اللى بيتدرب عليها ويمارسها الأطباء والمعالجون النفسيون فى النظام الصحى البريطانى NHS حتى الآن فى 2022.. وأن برامج التدريب على الطب النفسي psychiatry والعلاج النفسي الطبى medical psychotherapy واللى بتؤهل لتخريج أطباء أخصائيين واستشاريين، بتعرض وتناقش أبحاث وكتب وفصول التحليل النفسي بمدارسه وتوجهاته المختلفة بشكل شبه أسبوعى لليوم، سواء للعلاج النفسي الفردى Psychoanalysis أو الجمعى Group Analysis).
المهم..
كنت من قبيل الاحترام بناديه (دكتور روبرت).. وافتح له باب المكتب وأقوله يتفضل يدخل أو يخرج الأول.. وماقعدش وهو واقف أو أضع قدم على قدم أمامه.. فى حين انى لقيت سكرتارية القسم بيندهوه باسمه.. ويقولوله “انت جاى متأخر عن معادك دقيقتين النهاردة”.. وانه بيقتسم مكتبه مع أستاذ آخر بيجي الجامعة أيام تانية غير أيامه.. إلى جانب وجود لجنة من ثلاثة أساتذة (كلهم أصغر منه سناً ومقاماً) بتشرف عليه، وبيقابلونى كل 3 شهور معاه، علشان يسمعوا تقييمى لشغلنا مع بعض، ولو فيه أى ملاحظات أو تعليقات من جانبى أو من جانبه..
المهم.. مش عارف إيه اللى كان فى دماغ الراجل، لما سألنى فى أول القعدة:
– هل تعرف الفرق بين الاعتقاد والحقيقة؟ Do you know the difference between a belief and a fact؟
بدأت أستجمع الرد فى عقلى وبدأت فى سرده ليه.. لكنه قاطعنى بهدوء وقالى:
– لأ.. ماتستعجلش على الرد.. انت مكلف الآن بعمل أول Paper (ورقة بحثية) فى رحلتنا سوياً.. وهانخلى عنوانها What is a clinical fact؟ ما هى الحقيقة الاكلينيكية.. معاك شهر.. وتجيلى بالإجابة..
وده كان الدرس الأول..
د. محمـد طــه