…… وبناء على امبارح.. وبعد كل ما سبق وحدث وحصل واتكرر.. ولسه هايتكرر.. نلاقى ثقافتنا -بالرغم من كل جمالها وميزاتها- تتفرد وتختص بالآتى:
– عقلية انتظار المعجزة: اننا نبقى مستنيين انه هاتحصل معجزة لصالحنا.. حتى لو كان ده ضد المنطق وضد الظروف.. وضد سنة الحياة نفسها أحياناً.. قرأت وصف من أحد المفكرين مرة: (عقلية الساحر) فى مقابل (عقلية الصانع).
– الشعور الزائد بالاستحقاق: لدرجة انك تبقى مش عامل اللى عليك.. ومش واخد بالأسباب الصحيحة لتحقيق اللى انت عاوزه.. لكنك مصدق من جواك انك أحسن من غيرك.. وتستحق النجاح والفوز والتكريم وتخطى الصعب.. كده.. لمجرد انك انت.. انت.. علشان إيه؟ علشان أنا. هو كده.. علشان أنا كده.
– التقديس ثم نزع القيمة Idealization-Devaluation: وده اللى حصل بشكل فج مع محمد صلاح.. اننا نطلع بحد سابع سما النهاردة.. ونخسف بيه سابع أرض بكرة.. مالناش عزيز.. اللى بيحصل مع محمد صلاح من امبارح تجاوز حدود الأدب والعقل والدين..
– العناد: تبقى قدامنا كل العلامات والتحذيرات والإشارات الحمراء.. لكننا نعند.. ونصر.. وندى فرص بسخاء شديد.. لغاية ما نلبس فى الحيط.. مدرب غير مناسب من أول يوم.. فريق يحتاج إعادة تأهيل.. ومنظومة رياضية تحتاج إعادة النظر.. لكننا قررنا نكمل.. زى ما احنا.. فى نفس خط السير.. وبإصرار عجيب.
– الانكار: وده ورا العناد وقبله.. انك تقرر تعمى عينك -وبكل أريحية- عن الحقائق الواضحة وضوح الشمس.. فى مقابل راحة نفسية وقتية.. أو شعور زائف بالأمل..
– كبش الفداء: ننسب كل الأخطاء والمساوئ.. أو النجاح والمحاسن.. الخاصة والعامة.. بتاعة الفريق.. وبتاعة الماتش.. وبتاعة المجتمع كله.. لشخص واحد.. صخب ودوشة ومهرجانات.. أو سكاكين وأسنة ورماح من كل حدب وصوب.. على شخص واحد.. وعادة بيكون كبش الفداء للأسف هو الشخص الأفضل والأكثر أدباً وتهذيباً.. وعدم قدرة (أو رغبة) فى الدفاع عن نفسه.
– الاسقاط: وده ابن عم (كبش الفداء) وأحد دينامياته.. انك تُسقط وترمى أخطاءك ومشاكلك ونواقصك.. كأفراد.. أو كمجتمع كامل.. على شخص.. أو عدة أشخاص/فريق/منظومة.. رغم ان كل شئ تحت سماء هذا المجتمع هو عينة عشوائية ممثلة لهذا المجتمع.. وكل قطرة ماء منه.. تعبر عنه كله.. كل إناء ينضح بما (فيه).. مش بما فى (إناء تانى غيره)..
– تكرار نفس الأخطاء وانتظار نتيجة مختلفة فى كل مرة.. وكأنه نوع من التكرار القهرى.. أو عقاب النفس.. أو جلد الذات.. أو الماسوشيزم..
– الاختزال: اختزال شخص فى موقف.. اختزال معرفة كاملة فى جملة.. اختزال تاريخ كامل فى مشهد.. الاستعداد لنسيان سنوات طويلة من النجاح والاجتهاد والشرف.. أمام لحظة.. أو خطأ.. أو كبوة..
– مش بنعرف نفرق بين التقييم.. أو النقد .. وبين التجاوز والتجريح والإهانة والشتيمة والتنكيل.. أو بنعرف نفرق.. بس بنستسهل.. أو.. بنستسهل..
د. محمــد طــه
