– أنا قصيت شعرى يا دكتور..
– آه يعنى عملتى قَصَّة جديدة.. ماشى.. كويس..
– لا يا دكتور.. أن حوشت شعرى.. قصيته خالص..
– خالص؟ يعنى زيرو؟ مابقاش فيه شعر؟
– آه.. بالظبط كده..
 
طبعاً أول ما تبادر لذهنى بعد ما سمعت الكلمتين دول من (حياة- وده مش اسمها الحقيقي)، هو إنها عملت ما نسميه فى كتب الطب النفسي (سلوك مؤذى للنفس Self-mutilation).. وده بيكون وراه أسباب كتيرة، ومعانى أكتر.. زى الإحباط.. أو الغضب.. أوالانتقام.. بس بدل ما يتم توجيهه لمصدره الأصلى (شخص أو أشخاص آخرين).. بيتم توجيهه لصاحبته.. يعنى بدل ما تؤذى حد.. تؤذى نفسها.. بدل ما توجع حد.. توجع نفسها.. بدل ما تشوه حد.. تشوه نفسها..
 
لكن فى الحقيقة اللى حصل فى باقى الجلسة كان على غير توقعى تماماً.. وعلى غير توقع اللى كتب كتاب الطب النفسي نفسه..
 
نتكلم الأول عن علاقة البنت بشعرها.. وبعدين أقولك باقى اللى حصل فى الجلسة..
****************************************
علاقة البنت بشعرها علاقة معقدة ومركبة جداً.. رغم إنها قد تبدو غير ذلك.. وده مالهوش دعوة بكونها محجبة أو غير محجبة.. أنا باتكلم هنا عن علاقتها بشعرها.. اللى هو جزء منها ومن جسمها..
 
الانطباع السائد والأشهر.. هو إن شعر البنت هو أحد مظاهر أنوثتها.. وحبها ليه واعتزازها بيه بيعكس بشكل كبير حبها لأنوثتها واعتزازها بيها.. بس ده مش كل حاجة..
 
قَصَّة شعر البنت ليها معنى.. طبيعة شعرها وتغيرها مع حالتها النفسية ليها معنى.. أمراض وأعراض الشعر ليها معنى.. وما يُمثله الشعر بالنسبة لصاحبته قد لا يخطر على عقل بشر..
 
شعر البنت بيكون أحياناً زى المراية اللى بتعكس علاقتها بنفسها.. يعنى لما تكون متضايقة من نفسها.. أو كارهاها.. شعرها يقصف أو يقشر.. لما تكون غضبانة.. محبطة.. مكتئبة.. شعرها يدبل وينكمش ويفقد بريقه.. ولما تبقى منشرحة ومقبلة على الحياة.. شعرها يطاوعها ويلين فى إيديها ويكتسى بلمعان الأمل..
 
البنت لما تحب نفسها.. بتهتم بشعرها.. وتراعيه.. وكأنه طفلها المدلل.. ولما تتأزم علاقتها بيه.. وتبدأ تهمله.. وتعامله كأنها رافضة وجوده.. اعرف فوراً إنها رافضة وجودها هى شخصياً..
 
كتير من البنات لما تمر بفترة اكتئاب أو صدمة عاطفية، تروح عند الكوافير تقص شعرها.. وكأنها بتحاول تتخلص من سواد الاكتئاب وكثافته، بالتخلص من بعض كثافة شعرها.. زى ما تكون بتغير مودها ومزاجها عن طريق تغيير شكلها.. وده ساعات بينفع فعلاً.. علشان احنا حالتنا النفسية بتتغير أحياناً من الخارج للداخل.. والكوافير هنا بيعمل اللى مايعرفش يعمله ألف طبيب نفسي..
 
ده غير العلاقة بين (الزهق) و (الشعر).. اللى هو زهقانة فتقص شعرها.. أو زهقانة فتغير فورمته.. أو زهقانة فتعاقب شعرها بإهماله..
 
وطبعاً هوس نتف الشعر Trichotillomania ده حكاية تانى خااااالص.. فيها كتب لوحدها.. عن معنى ده.. وما تمثله كل شعرة يتم نتفها/قتلها/التخلص منها، أو إيلام النفس من خلالها..
****************************************
دورة حياة البنت متوزاية تماماً مع علاقتها بشعرها.. وكل مرحلة فيها بيكون لشعرها فيها دور.. ووظيفة.. ومعنى..
بتحس بقربها من أمها لما تسيبها تسرحلها شعرها وتشكله زى ما هى حابة وشايفة (الأم)..
 
ولما تحب تقول (لأ) وتٌصر وتعند.. بتغير التسريحة اللى مامتها عودتها عليها، بتسريحة غريبة شوية.. أو شويتين..
 
ولما تحس إنها كبرت.. وإنه من حقها تختلف وتختار وتقرر..تعيد تشكيله من تانى.. مع تشكيل نفسها الجديد..
ل
ما تتجوز.. بتحس فى علاقتها بشعرها إنها ملكة متوجة، مليانة أنوثة وجمال..
 
ولما تحمل وتخلف وهورموناتها تلعب بيها.. شعرها بيلعب بيها هو كمان.. وتتغير طبيعته زى ما طبيعيتها اتغيرت..
 
ومع أول شعرة بيضا تظهر فى راسها.. تختلف نبضات قلبها إلى الأبد..
****************************************
البنات بتغير قَصَّة شعرها.. وكأنها بتغير هويتها..
ماتستغربش..
قَصَّة شعر البنت بتعبر -فى أوقات كتير- فعلاً عن هويتها..
 
فيه قَصَّة متمردة.. فيه قَصَّة حادة قاطعة.. قَصَّة تانية هاجمة..
 
فيه قَصَّة مالهاش ملامح ولا حدود.. تعبر عن حيرة وتيه وأسئلة.. وقَصَّة غاوية مغوية.. تقربك وتبعدك وتتلاعب بيك زى تلاعبها بنسمات الهوا..
 
فيه قَصَّة تخفى جزء كبير من وجه صاحبتها.. اللى مش عاوزة تشوف العالم.. ولا العالم يشوفها.. وقَصَّة تبرز وجه صاحبتها.. وكأنها بتتحدى بيه الدنيا كلها..
 
فيه قَصَّة طفولية.. فيها من طفولة صاحبتها وقربها منها.. وقَصَّة عجوزة حزينة.. فيها من حزن صاحبتها ووحدتها..
 
فيه قَصَّة أميرة حاسة جمالها وبتحبه.. وقَصَّة فتاة بائسة على حافة الانتحار..
 
فيه قَصَّة محافظة منظمة مرتبة زى الوسواس القهرى.. وقَصَّة ثائرة خارقة للقواعد زى الشخصية الحدية..
 
فيه قصة بتدفن الأنوثة.. وقصة بتحييها وترويها وتزهرها..
 
فيه قَصَّة معاها قرار بالحياة.. وقَصَّة معاها قرار بالموت..
****************************************
الشعر نفسه.. كجزء من الجسم.. سواء عند الولد أو عند البنت ممكن يمثل حاجات كتير جداً..
 
ممكن يمثل علاقته بأبوه.. أو علاقتها بأمها.. نفس القصة.. نفس التسريحة.. نفس سن الصلع..
تغيير شكل وطول الشعر ممكن يمثل رغبة فى التفرد والخصوصية بعيداً عن سلسال الآباء والأمهات والأجداد والجدات بكل ما ورّثوه للإبن أو الابنة..
 
صبغ الشعر قد يعنى الخوف من الموت.. وخداع المراية بصغر السن..
 
إطلاق الشعر وتطويله وعدم قصه لفترة طويله قد يعنى الرغبة فى الحرية والانطلاق.. أو التمرد ورفض المألوف.. أو الكسل والإهمال والرغبة فى الدفن حياً..
 
الاهتمام الزائد بالشعر.. ربما يشى بنرجسية زائدة.. أو ضعف ثقة شديد بالنفس..
 
حلق الشعر عند الإحرام ممكن يكون رمز للتخلص من الذنوب والخطايا.. وفتح صفحة جديدة مع نفسك وخالقك..
****************************************
 هذا ما كتبته (حياة).. مريضتى العزيزة.. فى درس جديد فى علم النفس والطب النفسي والعلاج النفسي.. وفصل مبهر فى كتاب السيكوباثولوجى اللى قائم كله على وصف المرضى لمشاعرهم واعتمالات نفسهم وعالمهم الداخلى..
 
” النهاردة قررت يا (حياة) إنى أحلق شعرك..
يعنى أقص عنك أيام من الاستغلال والبكا والحرقة والوجع..
أنا مسئولة عنك يا (حياة)..
أنا قررت أعالج شعرى بإنى أقصه من أوله، وأبدأ الحكاية من الجدور..
أبدأ أرعى الجدور واحد واحد..
أبدأ أوصَّل لكل جدر من شعرى (حب) مش (إحساس بالذنب)..
أنا قررت أكون موجودة..
قررت ماسمحش لأى حد ولا لنفسي إنى أعيش حاجة أقل من اللى أستاهلها..
أنا محتاجة أصدق وأعيش وأشوف وأمارس إنى أستاهل أتشاف وأتقبل وأُحترم..
أنا هابدأ أسكن جسمى من تانى..
It is my space”
 
الى بتوصفه (حياة) مش غضب ولا اكتئاب ولا انتقام.. حياة بتوصف Transformation.. عملية تحول نفسي واصلة لأعمق طبقات وجودها.. انتقال حقيقي من موقف فى الحياة.. إلى موقف آخر فى الحياة.. إعلان صادم عن الحق فى الوجود.. صرخة عالية فى وجه كل من أذاها وشوهها وحاول كسرها..
 
الشعرة التى تنبت بعد قصها.. تكون أقوى وأصلب.. وكذلك الأنثى..
 
يبدو إن فيه قَصَّة شعر..
بتعبر عن ولادة جديدة.. وعمر جديد.. وأمل جديد..
عن انتهاء عهد.. وبداية عهد..
عن استعادة النفس.. واسترجاع الروح..
عن التحكم من جديد فى مقاليد الأمور..
عن الرجوع خطوتين للخلف قبل بداية سباق الألف ميل..
 
شعر البنت مش بس مرايتها.. شعر البنت صاحبها.. ولسانها.. وصوتها..
طريقة إعلانها عن نفسها.. وموقفها من الحياة..
شعر البنت فيه قصة حياتها..
 
قَصّة (شعر حياة)..
هى (قِصَّة) شعر حياة..
 
• طبعاً المقال ده مش بيقول إن البنات تروح تقص شعرها بالشكل ده.. ولا يمثل دعوة لأى بنت إنها تعمل كده.. دى مش طريقة علاجية.. ولا توصية طب-نفسية.. دى تجربة خاصة جداً لإحدى عميلاتى.. اللى خاضت خبرة العلاج النفسي لأكتر من سنة.. واللى حصل منها ده تلقائياً دون أى ترتيب (بعد سنة من العلاج النفسي واستبصار الذات).. وهى مازالت تخضع للعلاج والمتابعة القريبة.
 
د. محمد طه