رمضان 2018
الأسبوع الثانى
أكتر لحظة موجعة فى إصابة محمد صلاح هى لحظة خروجه باكياً من الملعب.. هو ماكانش بيبكى بس من ألم الإصابة.. احتمال كمان كان بيبكى من الحمل اللى شايله على كتفه..
****************************
ويلفريد بيون Wilfred Bion عالم بريطانى من أصل هندى.. عاش فى الفترة من 1897 إلى 1979. بيون كان طبيب ومحلل نفسي عبقرى.. وأسس مدرسة مهمة جداً فى علم النفس اسمها Group Analysis أو التحليل الجمعى، وهى الطريقة الأساسية فى العلاج النفسي الجمعى فى بريطانيا ومعظم أوروبا حتى الآن.
بيون كان مهتم بدراسة مجموعات البشر وتحليلها، وعمل كتاب مرجعى سنة 1961 اسمه Experiences in Groups and other works، جمّع فيه رؤيته واكتشافاته فى المجال ده.
بيون معروف بإن لغته العلمية صعبة ومعقدة، لدرجة إنه فيه كتب وقواميس كاملة اتعملت بس لشرح لغة ومفردات بيون بس.. زى كتاب The language of Bion اللى عمله ساندلر سنة 2010.
المهم..
بيون قال إن فيه نوعين/مستويين من المجموعات البشرية.. نوع مفيد وصحى ومنتج سماه (مجموعة عمل) Work Group، ونوع مضر ومؤذى ومعطل سماه (مجموعة قائمة على الفروض الأساسية) Basic Assumption Group. وقال إن أى (مجموعة عمل) ممكن تفشل وتبوظ وتفقد أهدافها لو حصل فيها واحد أو أكتر من (الفروض الأساسية) التلاتة.. لأنها كده بتكون تحولت بقدرة قادر إلى (مجموعة قائمة على الفروض الأساسية)..
آسف على المقدمة الصعبة اللى حاولت تسهيلها بقدر الإمكان.. لكنها فعلاً مقدمة لابد منها..
****************************
مش هاتكلم عن الفرض الأول ولا التالت دلوقت..
الفرض التانى من الفروض الأساسية اللى ممكن تكون خطر على أى مجموعة من البشر.. اسمه (الاقتران) Pairing، يعنى أفراد المجموعة يختاروا (بشكل واعى أو غير واعى) حد أو أكتر منهم، يحطوا فيه كل آمالهم.. ويعلقوا عليه كل أحلامهم.. وينتظروا منه تحقيق المعجزات.. بالنيابة عنهم..
بيون سمَّى الحكاية دى Pairing، علشان العقل الباطن للمجموعة وقتها بينظر للشخص ده وكأنه المسيح/المنقذ/المولود المنتظر/المُخلّص اللى هايخلص المجموعة من أى قلق أو خوف أو فشل أو إحباط.. من غير ما يبذلوا هما أى مجهود..
بيون لاحظ الأول ان معظم المجموعات بتختار اتنين يكون فيه ما بينهم كيميا معينة وتعمل لهم Pairing (وده مصدر التسمية).. لكن تطور نظريته خلانا نشوف ان ده ممكن يحصل مع واحد بس من المجموعة.. وساعات أكتر.. وأحياناً يحصل مع فكرة.. مجرد فكرة تنتظر المجموعة تحققها.. بس دى قصة عميقة ومعقدة ويطول شرحها..
المجموعة فى الوقت ده، بتكون فى حالة عارمة من البهجة، والشعور الشديد بالانتشاء.. والوقوف بكل ثقة على أعتاب المستحيل..
الوصف ده بيفكرك بحاجة؟ بيفكرك بحد؟
آه.. بالظبط..
احنا (غالباً) عملنا كده مع (محمد صلاح)..
احنا حملنا الراجل كل آمالنا الشخصية والمجتمعية.. وعلقنا عليه كل أحلامنا المنتظرة.. وشوفنا فيه البطل المظفر القاهر اللى هايحقق لينا كل الانتصارات والبطولات.. واحنا قاعدين نتفرج..
بيون بيقول إن ظاهرة ال Pairing وارد إنها تحصل بشكل طبيعى وصحى ومطلوب فى معامل الأبحاث العلمية.. اللى بتكون فيها مجموعة العلماء فى انتظار اكتشاف/اختراع/مولود علمى جديد، ناتج من تعبهم ومجهودهم طول سنين.. لكن الظاهرة دى لما تحصل خارج هذا السياق (أو ما شابهه) بتكون خطر جداً، علشان حاجتين:
الحاجة الأولى هى إن الناس ممكن تتكاسل عن إنها تعمل وتجتهد وتكد لتحقيق أحلامها الشخصية.. وتتراخى فى الحركة والسعى نحوها.. طالما عقلهم الباطن بيقولهم إن فيه حد ممكن يقوم بده بالنيابة عنهم..
والحاجة التانية هى إنهم ممكن يصابوا بالصدمة والخذلان الشديد لو حصل أى حاجة تعوق هذا الشخص من تحقيق الهدف أو الحلم المنتظر.. وساعتها مش هاتكون الحكاية صدمة أو خذلان لبنى آدم واحد.. لأ.. دى صدمة وخذلان لمجموعة كبيرة من الناس..
وده بالظبط اللى حصل بعد إصابة (صلاح).. مزيج من مشاعر القلق.. الخوف.. الغضب.. والإحباط..
كتف (صلاح) اتصاب من لاعب أسبانى أرعن..
لكنه قبلها ممكن يكون تعب من الحمل التقيل اللى كان شايله..
بكاء صلاح ماكانش من ألم الإصابة بس..
هو كان عارف فيه كام مليون واحد عاقدين الأمل عليه.. فى مصر وغير مصر..
حمل تقيل أوى..
إحنا حطينا كل أحلامنا فوق كتف محمد صلاح.. واستنينا منه يحولها لحقيقة..
علقنا كل آمالنا فى رقبته.. وانتظرنا منه يحققها لنا..
شيلناه شيلة تقيلة جداً، حرمناه بيها من حقه البشرى فى الضعف الإنسانى..
بالمناسبة.. حبك الشخصى لمحمد صلاح حاجة.. ليها معناها وأسبابها.. وحبنا ليه كمجتمع وشعب وأمة وعالم حاجة تانية خالص.. وليها أسباب ومعانى مختلفة تماماً.. بس بلاش نعقد الأمور دلوقت..
إلى جانب كونه رياضى استثنائى، فهو بقى فى نظرنا (ونظر كتير غيرنا) الشخص المسئول عن تغيير صورة العرب فى الخارج.. والإنسان اللى بيغير الانطباع السائد عن الإسلام، ويقاوم الإسلاموفوبيا، واللاعب اللى مصير منتخبنا فى كاس العالم معتمد عليه، والبطل اللى مطلوب منه يحقق إنجاز فى كل ماتش، ويجيب جول فى كل مباراة.. مين يقدر يشيل كل ده؟
علاج كتف صلاح مش بس علاج طبى فى أوروبا..
علاجه الأهم هو علاج إنسانى فى مصر، ومن مصر..
وصلوله إن شفائه وتعافيه أهم من كاس العالم نفسه.. أهم من إنه يكون Fighter.
قولوله إنه هو كبنى آدم ليه الأولوية ألف مرة على أى حاجة ممكن يعملها..
عرفوه إن مجرد وجوده شئ جميل ومبهج ويبعث على الفرحة..
اعتبروه ابنكم.. اللى ماينفعش نساويه بمجموع درجاته.. أو نتايج امتحاناته..
اللى عاوز يساعد فى علاج صلاح.. يخفف الحمل شوية من عليه..
اللى بيحب محمد صلاح بجد.. مايبطلش اجتهاد وسعى لغاية ما ينجح زيه..
اللى شايف إن صلاح أسعده وأسعد الناس .. يقرر إنه يسعد ولو (بعض الناس).. إن شالله عيلته وأهل بيته..
انت كمان تقدر تغير صورة العرب..
انت برضه ممكن تصلح الانطباع السائد عن الإسلام..
انت ممكن تشتغل، وتنجح، وتبدع، وتتفوق، وتبهر..
صلاح نموذج ومثل يحتذى.. لكنه مش بديل عن انك تكون أيضاً نموذج ومثل يحتذى..
نشيل الشيلة مع بعض.. أحسن ما نشيّلها لواحد فينا.. لغاية ما كتفه يتعب.. ويقع.. ويبكى.. من خوفه ليخذلنا..
د. محمد طه
