– شاب سكران، أو تحت تأثير مخدرات، سايق عربيته بمنتهى الرعونة والاستهتار، عرض حياة كل من حوله على الطريق لخطر حقيقي..
– سائق سيارة نقل كبيرة بمقطورة قام بخبطه من الخلف بشكل يبدو متعمد.
– سيارة الشرطة طاردت الولد، لغاية ما توقف.. لالقاء القبض عليه..
ركاب السيارات اللى وراه واللى حواليه عملوا إيه بقى؟
سارعوا بالنزول من عربياتهم.. فتحوا عليه باب عربيته.. ونزلوه.. ضربوه علقة موت.. الراجل كان هايموت فعلاً.. وأصوات الناس بدأت تتعالى فى آخر
جمهور السوشيال ميديا وغيرهم شايفين ان اللى عمله سائق المقطورة بطولة.. وان الولد يستاهل يتضرب العلقة.. وان هما كده عملوا معاه (الصح)..
وأى حد يتكلم أو يعلق ويقول يا جماعة ماينفعش كده.. هو خلاص هايتسلم للجهات المختصة.. سيبوه يتحاسب بالقانون.. يترد عليه ردود مستغربة.. ومستنكرة.. وغاضبة..
طيب.. يعنى كده الناس تنفذ بنفسها.. اللى هى شايفاه من وجهة نظرها صح؟
يعنى أى مجموعة من البشر.. يعملوا اللى هما عاوزينه.. فى أى حد؟
ببساطة كده؟
طب أنا طبيب نفسي.. وأقدر أحط مليون احتمال تشخيصى مرضي ممكن يطلع منه تصرف زى ده.. مين يتحمل ذنبه ساعتها؟
وحتى لو ماكانش مريض.. وماكنش تحت تأثير مخدر.. وكان قاصد ينتحر مثلاً.. أو كان قاصد ومتعمد إنه يتسبب فى حادث.. هل ده يخلينا نعزقه ضرب لغاية ما روحه كانت هاتطلع فى ايدينا؟
ده اللى عمله سواق التريللا كان ممكن يتسبب فى كارثة أكبر بكتير جداً من سواق العربية.. ده مشى بعرض الطريق مرتين خلال دقيقة واحدة بعد ما خبطه..
دى همجية يا اخوانا.. بلطجة.. غابة..
الرد على سوء الفعل.. بفعل أسوأ.. همجية..
مقابلة التهور.. بتهور أكبر.. بلطجة..
السطو على حق القانون فى تناول الأمور.. شريعة الغاب.. أعراف الشوارع..
ده غلط يا جماعة..
ده خطر..
ماينفعش سلوك (القبيلة) هو اللى يتحرك ويسود..
للأسف أنا متوقع التعليقات..
وعارف ان الوقوف أمام جمع متحفز.. مش بيجيب نتيجة..
بس أعمل إيه؟
ده اللى أعرفه..
د. محمـد طـه