الموت: حقيقة.. مافيهاش جدال ولا هزار.. هايحصل هايحصل.. لكل المخلوقات.. ليك وليا ولكل حد نعرفه أو نحبه.. حقيقة صادمة ساحقة.. لا نملك أمامها إلا التسليم.. والعجز التام..
المعنى/اللامعنى: ايه معنى الحياة؟ ليه جينا هنا؟ بنعمل إيه؟ وليه؟ إيه المعنى وسط كل هذه الآلام والمصاعب والأهوال اللى بتعدى علينا.. إيه معنى اللقاء ثم الفراق.. الفرح ثم الحزن.. إيه الفكرة؟ إيه الهدف؟
العزلة/الوحدة: قابل كل يوم مية واحد، عيش وسط عيلة من عشر أفراد، صاحب، وحب، واتجوز.. اشتغل.. سافر واعرف ناس وأماكن.. لكن فى الآخر.. انت وحدك.. ليك وعي منفرد.. دماغك مقفولة عليك بكل ما فيها.. محدش بيحس أحاسيسك زيك.. محدش يعرف اللى حاصل جواك غيرك.. انت صندوق مغلق يمشى على قدمين.. وسط مجموعة هائلة من الصناديق الأخرى..
الحرية: هو انت حر بجد؟ يعنى انت بتختار اللى بتختاره فعلاً؟ طيب ومئات العوامل اللى بتؤثر عليك كل لحظة؟ طيب ومستويات السيروتونين والدوبامين اللى فى دماغك؟ ووصلاتك العصبية اللى بتحدد من يوم ولادتك بعض صفات شخصيتك.. وجيناتك؟ وتأثيرات مجتمعك؟ انت فعلاً اللى بتقرر؟ فين حدود مسئوليتك؟ هو فيه حد فاصل؟
الموت Death، اللامعنى Meaninglessness، العزلة Isolation، الحرية Freedom..
دول الأربع معضلات الوجودية Ultimate Existential Concerns.. اللى شاف علماء النفس الوجوديين انهم فى عمق كتير جداً -ان لم يكن كل- الصعوبات النفسية.. من أول الاكتئاب وحتى الادمان.. حتى ادمان العمل.. حتى ادمان الجنس..
أربع مشاكل وجودية.. بيخلقوا جوانا آلاف الأسئلة.. ويحركوا داخل عقلنا الباطن كل أنواع التوتر والقلق والخوف، من أول ما نسميه Signal Anxiety، وحتى ما نسميه Annihilation Anxiety (الخوف من السحق/العدم)..
أربع آلام مزمنة فى عقل البشر والبشرية منذ نشأتها.. أربع علامات استفهام بحجم الكون والمجرات والعوالم..
وقصاد كل حيرتها.. وأسئلتها.. والقلق والخوف الناتج عنها.. ولأن هذا العقل المسكين لا يستطيع الصمود طويلاً أمام الحيرة والغموض وعدم الوضوح.. ابتكرنا عشرات ومئات الطرق للتعامل معاها من أول الميكانيزمات الدفاعية النفسية وحتى الضلالات والهلاوس.. اخترعنا كل ما يمكن لتهدئة ضغطها والحاحها.. من أول الفلسفة والعلوم وحتى الأدوية والمخدرات..
ساومنا كل المساومات لايجاد بعض الإجابات..
اللى نجح.. قادر يعيش فى سلام.. حتى لو كان نسبى..
واللى مانجحش..
يا اما مازال بيبحث ويتساءل ويدور.. رغم المخاطرة.. رغم الغموض.. رغم التيه..
أو قرر يغيّب وعيه عن القصة دى برمتها.. بمليون شكل وشكل..
أو وقع فريسة لمشاكل وصعوبات نفسية وروحية.. وأحياناً جسدية..
احنا فى منتهى الغلب والله.
د.محمــد طــه