تبدأ الرحلة عادة بانك تكون عايش حياتك العادية.. وسط ناسك وعلاقاتك ودنيتك.. بتعمل اللى تعرفه.. وتبعد عن اللى ماتعرفوش.. بتقضى الأيام يوم ورا التانى.. واهى ماشية..
لكنك مش مرتاح..
حاسس ان فيه حاجة غلط.. فيه حاجة ناقصة..
حاسس ان المكان ضيق عليك حتى لو كان مريح..
حاسس انك ماينفعش تعيش كده.. وتموت كده.. بالبساطة دى..
صوت جواك بيقولك: فيه حاجة تانى.. حاجة أكبر.. حاجة أبعد.. مكانك مش هنا..
بس اللى (مش هنا) ده مجهول.. بعيد.. مخيف.. غير متوقع.. صعب.. فعلى إيه.. خلينا هنا.. واهى ماشية..
شوفت فيلم Matrix ؟
شوفت نيو اللى كان عايش حياته بشكل يومي أقرب للتكرار والملل، قبل ما تجيله رسالة الكمبيوتر..
شوفت فيلم Lion King ؟
سيمبا اللى كان عايش مع أبوه الملك وأمه.. وكان أبوه بيحذره من انه يروح للمنطقة المجهولة البعيدة على أطراف مملكته..
طيب شوفت Moana؟
اللى برضه كانت عايشة حياتها العادية فى بيتها وسط أهلها.. وكان أبوها بيحذرها تركب البحر وتروح تصطاد بعد منطقة معينة كلهم شايفينها مجهولة وخطر..
طيب Leon؟ اللى كان عايش حياته بشكل يومي معتاد قبل ما (ماتيلدا) تخبط على بابه، وتقلب حياته..
و Adjustment Bureau اللى كان ديفيد بيعمل فيه شغله، ويجهز لحملته الانتخابية بشكل مدروس ومتوقع، قبل ما يقابل (إليس)؟
إيه ده؟ هى الحاجات بتتكرر كده ليه؟
معقول الشبه ده؟ ده كلهم نفس البداية الهادية المعتادة قبل ما يحصل شئ معين يقلب الأحداث رأساً على عقب.. ازاى كده؟
هاجاوبك على السؤال ده بعدين..
لأن فيه غيرهم وغيرهم.. من أمثلة فنية مبسطة وواضحة جداً (عربى وأجنبى وبكل اللغات وفى كل الثقافات).. أمثلة على رحلة كاملة.. هاتبدأ حضرتك تفهمها وتاخد بالك منها فوراً دلوقت..
هاتفتح عينيك على عالم جديد تماماً.. ومنطقة نفسية غير مأهولة بالمرة.. وبعدين تكتشف انك انت شخصياً مريت.. أو بتمر حالياً بيها.. وانها رحلتك انت.. انت نفسك..
هاتكتشف انك فى بدايتها.. أو فى أحد مراحلها.. أو أنهيتها فعلاً..
هى بينى وبينك مش رحلتك انت بالظبط..
هانشوف بعدين..
المهم
فاكر؟
فاكر حياتك وشكلها وملامحها، قبل ما ………. (كمل من عندك ياللا..)..
يتبع..
