بيقولك يا سيدى إن (الكومفورت زون) هى المساحة النفسية اللى بيكون فيها الواحد مرتاح ومتطمن وحاسس بالأمان بعيداً عن أى قلق وتوتر..
لكنى شايف إن حكاية (الكومفورت زون) دى هى أكبر خدعة نفسية عرفها التاريخ..
ليه؟
لأنها مش أكتر من قوقعة نفسية مابتعملش أى حاجة غير إنها تقفل عليك.. وتحرمك من المخاطرة.. وتبعدك عن الناس.. ويبقى ده اسمه (باحمى نفسى).. و (باخد بالى من نفسي).. وبادلع نفسي :)..
الفكرة الأساسية فى (الكومفورت زون) هى (وهم الكونترول).. بمعنى إنك ماتعملش غير اللى تعرفه.. وماتعرفش غير اللى تألفه.. وماتحسش غير اللى انت متعود عليه..
الفكرة إنك تقلل كل الاحتمالات إلى أدناها.. وتحسب حساباتك انت الشخصية فقط.. وتكون متصور إن دى الراحة..
قال يعنى إنت كده متحكم بنفسك، ومخارجها ومداخلها.. ومسيطر على حياتك، بأبعادها وتفاصيلها..
انت بتحاول بكل طريقة إنك تتجنب التجربة.. وتتجنب الفقد.. وتتجنب الخسارة.. لكن اللى بتكون مش واخد بالك منه.. هو إنك بكده برضه بتتجنب الحياة.. وتتجنب القرب.. وتتجنب المكسب..
ففى خوض التجربة حياة.. وفى تجاوز الفقد نضج.. وفى قبول الخسارة مكسب..
فى رأيي إن (الكومفورت زون) ما هى إلا سجن.. به مكيف هواء..
طبعاً مقدر جداً اختيار بعض الناس إنهم يعيشوا فى هذه الفقاعة الهشة.. علشان اللى شافوه قبل كده كان ألم شديد.. أو جرح عميق.. أو أذى بشع.. لكن كل ده مش معناه أبداً إنى أعيش فى سجن.. معلق عليه لافتة (منطقة الراحة)..
يعنى ماحميش نفسي من حد أو حاجة بتؤذينى؟
لا طبعا.. أحمى نفسي جدا.. بس مش أحمى نفسي منه/منها ومن اللى جنبها واللى حواليها واللى معديين بالصدفة فى الطريق..
علماء التحليل التفاعلاتى Transactional Analysis، بيقسموا مواقف الناس فى الحياة لأربع مواقف:
– I’m Not OK, You are OK:
يعنى أنا انسان سئ، وانت زى الفل.. كتير من الناس المكتئبين أو اللى حاسيين بالدونية.
– I’m Not OK, You are Not OK:
يعنى إحنا الاتنين زفت.. والدنيا كلها سودا.. ومافيش أمل.. ودى الناس المتشائمة واليائسة.
– I’m OK, You are Not OK:
يعنى أنت وحش وأقل منى.. وأنا حلو وتمام وأحسن منك (كتير من النرجسيين والمتعالين).
– I’m OK, You are OK:
يعنى أنا شايف نفسي وحاببها وقابلها.. وشايفك برضه وقابلك ومعنديش معاك مشكلة حتى لو كنت مختلف عنى.
بيتقال بقى إن الموقف الأخير هو أكتر موقف صحى فيهم.. علشان بيعنى إنك مبسوط وان غيرك برضه مبسوط وانك سايبه ينبسط وماعندكش مشكلة فى ده..
لكن فيه طريقة تانية بيتشاف بيها الموقف ده.. وهى إنهم باينين من بره مبسوطين علشان كل واحد فيهم فى حاله.. كل واحد فى جزيرة منعزلة عن الآخر.. كل واحد فى فقاعة نفسية منفصلة.. وأنا تمام OK، وانت تمام OK.. وماحدش فينا ليه دعوة بالتانى..
ويكون الظاهر سعادة وسلامة نفسية.. والباطن عزلة.. وتقوقع.. وكومفورت زون..
خدعة بالمعنى الحرفى يعنى..
وكأن الكومفرت زون دى زى (الرحم)..
اللى الطفل عاوز يفضل فيه للأبد، من غير ما يتولد..
لأنه لو اتولد.. وخرج.. هايصرخ.. ويعيط.. ويتألم..
ويخاطر.. ويجرب.. ويقرب.. وينجح.. ويفشل.. ويحيا.. ويموت..
بس -وبكل أسف- مش هاينفع نعيش فى الرحم طول العمر..
مضطرين نتولد..
محتاجين نجرب..
محتاجين نقرب..
محتاجين ننزل على الأرض..
ونخطو خطواتنا الأولى..
خارج (الكومفورت زون)..
ياللا..
اخرج برجلك اليمين..
أو خليك جوه لوحدك..
د. محمد طه